2025-жылдын 24-мартында К.И. Скрябин атындагы Кыргыз улуттук агрардык университетинде кезектеги Окумуштуулар кеңеши өткөрүлдү. Кеңешмеде университеттин Кыргыз Республикасы менен Германия Федеративдик Республикасынын ортосундагы кызматташтыкты чыңдоого кошкон салымы, ошондой эле, Кыргыз улуттук агрардык университети менен көп жылдык жемиштүү биргелешкен долбоорлору үчүн Германия Федеративдик Республикасынын Системалык компетенциялар жана инновациялар тармагы изилдөө институтунун директору, доктор Маттиас Крамерге Кыргыз улуттук агрардык университетинин “Ардактуу профессору” наамы ыйгарылды.
К.И. Скрябин атындагы Кыргыз улуттук агрардык университетинин ректору академик Р. З. Нургазиев наам тапшыруу аземинде профессор Маттиас Крамердин ишмердүүлүгүн жогору баалап, анын мыкты кесипкөй адис экенине токтолуп, акыркы жылдары университетибиз үчүн жемиштүү долбоорлорду ишке ашырып жатканын баса белгиледи. Бул долбоорлор бир гана университетибиз үчүн эле эмес бүтүндөй мамлекетибиз үчүн пайдалуу экенин айтып өттү.
Ал эми университеттеги Кыргыз-герман институтунун директору доцент К. К. Уметов бул долбоорго жаш окумуштуулар, магистранттар жана студенттер да кызыктар экенин билдирип, долбоордун жетекчиси профессор Маттиас Крамердин ишмердүүлүгүнө токтолду.
Профессор Маттиас Крамер ыраазычылыгын айтып, өз сөзүндө айтылып жаткан АЛМА-КИКА долбоору Кыргызстандын экологиясын чыңдоого, жапайы алмаларды коргоого алаарын жана алардан адамзатка пайдалуу продукциялар өндүрүүлөрүн ишке ашырууга толук аракет кылып жатканын белгиледи.
